漂流手記(一)

最近呢幾個禮拜無更新 Patreon,令大家久等了。無更新並唔係因為我放棄咗呢個平台,而文係一直都有度緊同寫緊,至少仲有兩份半成品文稿排緊出,只係內容上仍然有啲位卡住咗未諗得通,加上最近遇上嘅麻煩事都多,所以到而家都遲遲未出,希望大家見諒。

人在外都一段時間,份外感受到離散在外者遇到嘅種種困難同思鄉情緒。喺今次出走之前,我離開香港最耐,應該係我畢業一年同大學同學去嘅一次十日臺灣 trip。當時為咗逃離工作帶來嘅壓力,於是揮霍返工同補習而賺來得嗰少少嘅積蓄同轉換合約之間嘅假期,任性出走十日。我而家特別懷念呢次 trip,除咗因為當時係有「歸期」地任性遊玩,亦因為當日嘅旅伴如今已經與我分隔兩地,甚至面對緊佢哋各自嘅艱困;而身處異地嘅我,已經無辦法有意義地分擔佢哋嘅種種艱困。

如今離散在外,除咗要 keep 住躊躇生活(生存)各種所需,盡可能避免為同路人帶來負累,同時帶住一份抽象而沉重嘅使命感。呢種感覺之所以抽象,正正因為人已經離開香港,無辦法繼續親身經歷香港而家同將來嘅故事,但仍然時刻心繫呢片生我孕我嘅土地。

又例如面對最近網上熱議支持民主嘅香港人應該如何看待移民一事,我身為一個「不在」之人,又如何搵到一個合適、正確嘅切入點參與討論呢?又或者香港觀眾應唔應該期待藝人就重大社會事件作政治表態,我又點能夠再以在地港人嘅身分去妄下評論呢?

現代人之脆弱和無力,除咗在於難以敵抗生活中所面對嘅種種霸權之外,更在於科技同網絡明明早已消除人同人之間因物理距離而衍生嘅資訊隔膜,但偏偏世界繼續有人因政治同戰亂而被迫與愛嘅人同地物理分隔——我睇嘅可能係香港新聞,聽嘅可能係香港音樂,Facebook 同 Instagram 嘅受眾可能仍然係香港親友,但我偏偏似在卻不在。即使透過社交媒體同網絡訊息見到朋友聚餐,或者摯友結婚生仔,我卻無法身處其中,只能透過回訊留言或道賀。透過海底光纖嘅二位元傳訊,無論係演唱會片段定係喺香港在地發生嘅時事資訊,即使聲畫有幾咁動人揪心,亦始終遠遠不及親處其中咁豐富厚實。

無錯,悲春傷秋無用,而更悲更傷嘅亦有人在。我呢篇手記志不在販賣慘情,而只係希望坦誠記錄同分享呢一刻嘅感想。或者有人主張似我咁嘅人應該拋開過去,好好 move on 融入旅居地,但恕我唔能夠完全認同:我講唔出「去留肝膽點點點」嘅豪情壯語,只能夠盡力呼吸、好好過活,喺未來未知嘅洪流中保存故我、自我裝備、做好自己,繼續追尋一條屬於自己嘅路。

By becoming a patron, you'll instantly unlock access to 5 exclusive posts
9
Images
1
Writing
By becoming a patron, you'll instantly unlock access to 5 exclusive posts
9
Images
1
Writing